Umugambwe CNDD FDD umenyeshako umunsi wo kwibuka imyaka 57 irarangiye Umuganwa Rudoviko Rwagasore yaharaniye incungu yo kwikukira kw’Uburundi agandaguwe n’ igihe c’umubabaro, kikaba n’igihe co kwisuzuma, mu ntumbero yo kurushirizaho gukora mu gutsimbataza intahe y’ukwikukira kw’Uburundi.

Mu kiganiro icegera c’umunyamabanga mukuru w’umugambwe CNDD FDD Joseph NTAKARUTIMANA yahaye abamenyeshamakuru kubijanye n’imyaka 57 iheze umuganwa Rudoviko RWAGASORE agandaguwe yamenyesheje ko
ata kindi yazize atari umutima wo gukunda igihugu camwibarutse abansi bamugandaguye ata kindi bashaka atari ukugupfukama munda igihugu c’Uburundi.

Joseph NTAKARUTIMANA yavuze ko umugambwe CNDD-FDD wiyemeje kuzokwama na ntaryo ushigikiye amategeko mpuzamakungu y’amahoro, intwaro rusangi, umutekano hamwe n’iragi ry’incungu y’ukwikukira kw’Uburundi.

Joseph NTAKARUTIMANA yarangije ahamagarira abarundi kugendera iragi ryarazwe n’incungu y ‘ukwikukira kw’igihugu cacu mu kurwanya abansi, mu kurwanya akarenganyo, kwirinda amacakubiri yariyo yose, kurwanya ba kaboko hamwe no kugwanya ayandi mabi atuntuza akongera akazingamika abanyagihugu.