Abigeme n’abagore baripfuza gutorana co kimwe na basaza babo

0 6-03-2014 - saa 15:43, IGIHE

Abakenyezi benshi ntibabona kumwe ikibazo c’ukunganisha ibitsina ariko barahuriza hamwe ko hari hakwiye ishirwa mu ngiro ry’itegeko ribaha uburenganzira bwo gutorana co kimwe n’abasaza babo.
Bamwe mu bapfasoni baganiriye n’ikinyamakuru IGIHE baridoga ko haheze imyaka myinshi cane Reta zama zirengagiza gushiraho amategeko ajanye no gutorana ku bakenyezi n’abigeme. Umupfasoni Ndayishimiye C. yaganiriye n’ikinyamakuru IGIHE we avuga ko ivyo ukunganisha ibitsina ataco vyoba bivuze mu gihe (...)

Abakenyezi benshi ntibabona kumwe ikibazo c’ukunganisha ibitsina ariko barahuriza hamwe ko hari hakwiye ishirwa mu ngiro ry’itegeko ribaha uburenganzira bwo gutorana co kimwe n’abasaza babo.

Bamwe mu bapfasoni baganiriye n’ikinyamakuru IGIHE baridoga ko haheze imyaka myinshi cane Reta zama zirengagiza gushiraho amategeko ajanye no gutorana ku bakenyezi n’abigeme. Umupfasoni Ndayishimiye C. yaganiriye n’ikinyamakuru IGIHE we avuga ko ivyo ukunganisha ibitsina ataco vyoba bivuze mu gihe hatabayeho ugutorana ku bigeme n’abakenyezi. N’aho kuja muri poritike ari kimwe mu bituma umukenyezi w’umurundikazi aronka aho avugira naho afatira ingingo, ariko ntibikwiye kuko mu gihe ata buryo afise, azokwama ahohoterwa. Uwo mupfasoni asaba abavyeyi ko n’aho iryo tegeko ritarashirwa mu ngiro, ko boza baribuka ko abana bose bangana kugira n’abigeme batorane nka basaza babo.

Mariya chantal Nahimana, umudandaza nawe avuga ko ku bwiwe vyari bikwiye ko umwigeme atorana co kimwe na musaza wiwe. Ariko ivyo kunganisha ibitsina wewe abibona ko bigoye, kuko abagabo bataremwe co kimwe n’abakenyezi, mbere n’imico iratuma bidashoboka. Agira ati : "Mu buzima bwa ruguru biragoye ko habaho ukungana hagati y’abagabo n’abagore. Aratanga uturorero, aho avuga ko nko mu mico y’ikirundi ata mukenyezi yurira inzu ariko arasakara, canke yurire igiti ariko arasenya. Abona ko ku bize bishoboka, kuko akazi gakorwa n’umugabo gashobora n’ugukorwa n’umukenyezi nk’uko abandanya abimenyesha. Uwo mupfasoni we aratandukanye n’abandi, kuko avuga ko vyari bikwiye ahubwo ko bokwunganirana mu bisata vyose yaba mu ndero y’abana, mu rudandazwa, hako boshaka kuja ku rugero rumwe.

Umwe mu bakenyezi basanzwe baharanira agateka k’abandi bakenyezi, Béatrice Nyamoya aremeza ko mu gihe amategeko ajanye no gutorana ku bakenyezi yoshirwa mu ngiro, ko vyofasha gusumvya. Umukenyezi yohatorera akoyokwe, kuko umwanya wose azomara adafise uburyo, azokwama ari inyuma. Nk’uko Béatrice Nyamoya abandanya abimenyesha, akenshi usanga abo bakenyezi batagira n’ico bagwatiriza yaba mu dushirahamwe two kuguranana canke amabanki bisigura ko bigoye ko batera imbere.

JPEG - 52.3 ko
Béatrice Nyamoya

Ku bijanye n’umunsi mpuzamakungu wahariwe umukenyezi wama uhimbazwa uko umwaka utashe ku genekerezo rya 8 Ntwarante, abo bakenyezi barawushima, bakavuga ko ari akaryo keza ko kuganira bagahanahana ivyiyumviro ku vyerekeye amabi akorerwa abandi bakenyezi bagenzi babo, hamwe n’ingene boyirinda. Ni akaryo kandi ko kwibutsanya n’abagabo ko batoza barabahotera bitwaje ko babasumvya inguvu.

Kumenyekanisha
Kumenyekanisha

Izindi nkuru wasoma

Kumenyekanisha

ANDIKA ICO WIYUMVIRA KURI IYI NKURU

AMATEGEKO AGENGA IYANDIKA RY'ICIYUMVIRO CAWE

Nta ciyumviro kirajako. Ba uwa mbere!  

Kumenyekanisha