Zimbabwe : Igisirikare cabeshuje ihirikwa ry’ubutegetsi
Yanditswe kuya 15 - Nov - 2017 saa 09:02

Kuva mw’ijoro ryo kuri uwu wa kabiri, niho hatangura kwumvikana ibisasu vyinshi ku murwa mukuru Harare, hakaba hibonekeje abasirikare benshi kw’iradiyo na tereviziyo nkuru y’igihugu ca Zimbabwe, ivyatumye haba ukwikeka ihirikwa ry’ubutegetsi, ariko igisirikare kikaba caciye kimenyesha mu bucagucagu bw’uwu wa gatatu ko atahirikwa ry’ubutegetsi ryabaye.

Igisirikare kikaba caciye kimenyesha ko umukuru w’igihugu Robert Mugabe n’umuryango wiwe bameze neza, aho ni mu gihe ikinyamakuru AFP cari camenyesheje ko humvikanye urwamo rwinshi rw’amasasu ku nkengera zaho umukuru w’igihugu aba.

Ikinyamakuru Reuters kivuga ko igisirikare cazibiye inzira zija ku nyubako zikomakomeye nk’inama nshingamateka, ubushikiranganji, n’izindi, hakaba hoba harafashwe n’abategetsi bamwe nk’umushikiranganji w’ubutunzi Ignatius Chombo akaba ari umwe mu bari mu kwaha kwa Grace Mugabe, umutambukanyi w’umukuru w’igihugu ahiganigwa ikibanza c’umukuru w’igihugu.

Igihugu ca Reta zunze ubumwe za Amerika, Ubwongereza, Canada, bikaba vyasavye abanyagihugu b’ivyo bihugu kuguma mu mazu bakirinda uruja n’uruza.

Ivyo biri uko mu gihe icegera c’umukuru w’igihugu yaheruka gukomborwa mu ndwi iheze yagirizwa guhememukira igihugu, ivyaciye biha inguvu nyinshi Grace Mugabe, bivugwa ko azokwitoza mu matora y’umukuru w’igihugu.



ANDIKA ICO WIYUMVIRA KURI IYI NKURU

Izina

Email


IVYIYUMVIRO

IZINDI NKURU

Kumenyekanisha
Kumenyekanisha
2015 ©. All rights reserved