Umumenyereza w’umurwi nserukiragihugu mu mupira w’amaguru « intamba mu rugamba », Olivier NIYUNGEKO amenyeshako uyo murwi wifashe neza kandi witeguriye neza kwakira umurwi nserukiragihugu wa Mali mu rukino rwo gusubiza rutegekanijwe ku musi wa kabiri igenekerezo rya 16 Gitugutu 2018.

Mu kiganiro yahaye abamenyeshamakuru kuruno wa mbere igenekerezo rya 15 Gitugutu 2018,Olivier NIYUNGEKO yavuze ko kubona bararonse inota rimwe mu gihugu ca Mali bibaha amahirwe angana na 60 kw’ijana yo gushobora gutsinda.

Olivier NIYUNGEKO asaba abakunzi b’umurwi nserukiragihugu kuzoja kuwushigikira kuko intsinzi ibonetse azoba ari umunezero ku gihugu cose.

Mu rukino rwabereye i Bamako mu gihugu ca Mali ku musi wa gatanu w’indwi iheze,urukino rwaheze igihugu c’Uburundi kinganya n’igihugu ca Mali ubusa ku bundi vyose bica bitahukana inota rimwe rimwe.