Abayoboke batatu b’idini rya Islam bahagaritswe n’igiporisi mu gatondo ko kur’uyu wa kabiri igenekerezo rya 2 Nzero 2018, muri komine Rugombo,intara ya Cibitoke. Amakuru ava mu Rugombo amenyesha ko bagirizwa gutunganya imyiyerekano.

Amakuru ava mu bayoboke b’idini rya Islam mu ntara ya Cibitoke, amenyesha ko abo bayoboke batatu bahagaritswe bagirizwa gutunganya imyiyerekano yo kwiyamiriza bamwe mu barongozi b’idini rya Islam.

Ayo makuru nyene amenyesha ko abahagaritswe uko ari batatu bagiriza, bamwe mu barongozi b’idini rya Islam,aho muri komine Rugombo, ko basesagura kandi bagakoresha nabi amatungo y’idini.

Naho bamwe mu miryango y’abahagaritswe isaba ko barekurwa, abarongozi b’idini rya Islam muri komine Rugombo bamenyesha ko borindira ubutungane bugakora igikorwa cabwo.