Aba isiramu bo mu Burundi bifadikanije n’abaisiramu bo kw’isi yose mu gutangura ukwezi kweranda kwa Ramadhan kur’uno wa kane igenekerezo rya 17 Rusama 2018. Mw’itangazo Cheick Sadiki Kajandi, arongoye umuryango w’aba isiramu mu Burundi yashikirije kur’uno wa gatatu igenekerezo rya 16 Rusama 2018, yasavye aba isiramu gukomeza urukundo.

Muri uku kwezi bita ukwo gupfunga, abaisiramu bagabanya ibiringo vyo gufungura abahora bafungura gatatu canke karenga bafungura ku mugoroba izuba rirenze, kandi bagahagarika no kunwa, kurangura amabanga y’abubatse ku bubatse.

Muri ico kiringo kandi abaisiramu bagerageza gukora iciza , mbere mu bijanye no kwemera bagasenga incuro zitanu nk’uko bisabwa n’igitabo ceranda bakoresha ca Korowani.

Gupfunga mu kwezi kweranda kwa Ramadhan ni imwe mu nkingi zitanu idini rya Isiramu ryubakiyeko.